अल्कोहोलिक्स ॲनॉनिमस | एकता आंतरसमूह

'अल्कोहोलिक्स ॲनॉनिमस'ची प्रस्तावना

'अल्कोहोलिक्स ॲनॉनिमस' म्हणजे निनावी मद्यपी. ही पुरुष व स्त्रियांची एक संघटना आहे. ह्यामधील सभासद आपले व्यक्तिगत अनुभव एकमेकांना सांगतात की, ज्यामुळे सर्व सभासदांचे मानसिक धैर्य वाढते व नवजीवनाची आशा स्फुरते. अशा तऱ्हेने सभासद आपले स्वत:चे तसेच एक दुसऱ्याचे प्रश्न सोडवतात आणि दारूपासून दूर राहतात.

या संघटनेत सामील होण्यास फक्त एकच अट आहे की, मद्यपाशाच्या आजारातून मुक्त होण्याची सभासदाची इच्छा असली पाहिजे. संघटनेत सामील होण्यास कोणतीही वर्गणी आकारली जात नाही. ही संघटना कुठलाही धर्म किंवा सामाजिक अथवा राजकीय तत्वांचा प्रचार करीत नाही. इतर कोणत्याही धार्मिक, सामाजिक किंवा राजकीय पक्षांशी ह्या संघटनेचा संबंध नाही.

संघटनेचे ध्येय एकच आहे की, 'मद्यापासून स्वत:ला दूर ठेवणे आणि इतर मद्यपीडीत लोकांना ज्यांना दारूपासून मुक्ती मिळविण्याची इच्छा आहे त्यांना मदत करणे.'

'मद्यपाश' आजार

20 व्या शतकात एक फार महत्वाचा शोध लागलेला आहे. तो म्हणजे 'व्यसनाधिनता हा एक कधीही न दुरूस्त होणारा मानसिक आजार आहे.' शंभर माणसे जर दारु पित असतील तर साधारणपणे पंधरा ते अठरा जणांना हा आजार होतो. हे निदर्शनास आले आहे.

'अल्कोहोलिक्स ॲनॉनिमस' च्या सुधारणेच्या बारा पायऱ्या

आम्ही मान्य केले आहे की मद्यशक्तीपुढे आम्ही हतबल आहोत, आमचे जीवन अस्ताव्यस्त झाले आहे.
आम्हास समजले की आमच्याहून महान शक्तीच आम्हास सुरळीत करू शकेल.
आम्ही निर्णय घेतला की आमची ईच्छाशक्ती व जीवन संपूर्णपणे परमेश्वरास सोपवून द्यावे.

'अल्कोहोलिक्स ॲनॉनिमस'च्या सभासदाचा एक अनुभव...

... हळूहळू-हळूहळू 'शानदार ड्रिंक्स घेणे' ची जागा 'दारू ढोसणे' ने कधी घेतली हे मला कळले सुद्धा नाही. घरातली, समाजातली माझी प्रतिमा बिघडत चालली होती. दारूच्या अजगराचा विळखा माझ्याभोवती दिवसेंदिवस घट्ट व्हायला लागला. जीव गुदमरायला लागला. कुणाला काय बोलावं हे कळेना, मला काय होतंय हे ही कळेना. आश्चर्याची गोष्ट म्हणजे असं सर्व घडत असताना हे दारूमुळे घडतंय असं मला कधीही जाणवत नव्हतं. माझे प्रश्न वेगळे आहेत, माझ्या समस्या वेगळ्या आहेत असंच मला सारखं वाटायचं. 'मी दारु पीत नाही तर मी 'ड्रिंक्स' घेतो' असा माझा समज होता. 'दारुडे' वेगळे आणि मी वेगळा माणूस आहे असं मला वाटायचं. 'दारूडे' म्हणजे देशी दारुच्या दुकानासमोर दारू पिऊन वाकडे-तिकडे पडलेले, बायकोचे दागिने-घरातली भांडी विकून दारू पिणारे म्हणजे 'दारूडे' अशी माझी समजूत होती. पण 'दारूडा' या शब्दाची व्याख्या कळायला मला बरंच कांही बघावं लागलं, सोसावं लागलं...

नवागताचे प्रश्न

प्रथमच ए. ए. संघटनेत येणाऱ्यांसाठी हे माहिती पत्रक आहे. नवीन येणाऱ्या व्यक्तीच्या मनात असलेले प्रश्न – जे आम्ही जेव्हा प्रथम आलो तेव्हा आमच्याही पुढे उभे होते – सोडवण्याचा प्रयत्न येथे करीत आहोत.

मी मद्यपी किंवा दारुडा आहे का?

परत-परत इच्छेपेक्षा जास्त तुम्ही पित असाल, पिण्यामुळे वारंवार अडचणीत येत असाल, प्यालानंतर बऱ्याच वेळा विस्मरण होत असल्यास, आपण मद्यपी, दारुडे, शराबी, किंवा अल्कोहोलिक असू शकता.

परंतु हे फक्त तुम्हीच ठरवू शकता. ए. ए. मधील कोणीही तुम्हाला तुम्ही मद्यपी आहात किंवा नाही हे सांगणार नाहीत.

माझ्या पिण्याबद्दल मला काळजी वाटते , तरी मी काय करावे...